Heb 3 | WSK | STEP | Aga Kris singsang, Kaem ninga auram nina duruk wonong te ilak bagaralko ma balam. Buta se nina ko Gilalong Kari Jesus la ko ikialko. Nu anananga Priest Supuling, ana ko nangamang ningi nunguning aram se ko den balsan.

Hebrews 3

Moses mu Kaem ko ura kari ningo, bare Jesus mu Kaem ko Namar

1 Aga Kris singsang, Kaem ninga auram nina duruk wonong te ilak bagaralko ma balam. Buta se nina ko Gilalong Kari Jesus la ko ikialko. Nu anananga Priest Supuling, ana ko nangamang ningi nunguning aram se ko den balsan. 2 Nu Kaem kuring karo tuam ale ura bitirukko balam mu diram la beteram, Moses Kaem ko kariimet ningi ura bitakaso iwitatala Jesus ura beteram. 3 Bare Kaem nup biya Jesus tuam, se nup mu Moses ko nup kiaram. Mu awuk, kari kawam kaloso umutang mu nup biya taso, bare kawam umutang mu nup biya nunguning me taso. ^{▼▼Heb 3:3 Kawam kaola ko kari ko balso umutang Jesus, se kawam ko balso umutang Kaem ko kariimet biguwura suwanta.} 4 Kawam bo kota numi me kaloso. Mena. Mu kari kawam kaloso. Se Kari mel suen biya beteram mu Kaem.

5 Moses mu Kaem ko ura kari, se nu Kaem ko kariimet ningi ura diram la bitakaso, ale den nunguning gilalong kari alo udagi wetang te balmonko mu ko nunga manarukaso. 6 Bare Kristus mu nu Kaem ko Namar, se noko ura mu nu Kaem ko kariimet nunga Biya ko baga se nunga bituokko. Ale nu ura mu diram la beteso. Se kariimet nu nunga bitaruwoso umutang mu ana ewerta. Bare nanga nangamang ningi nunguning ana ko amilmilasan umutang ilukuawunak ale nangamang sokel ago baganak mu asele. ^{▼▼Heb 3:5-6 Moses mu ura kari ningo: Numbers 12:7. Kristus mu Kris kariimet nunga Kari Biya: Col 1:18. Nanga nangamang ningi nunguning ilukuawunakko: Mark 4:16-17.}

Ana nangamang aora biya me baganakko

7 Umutang ko, Korang Bur baluwoso iwitata:

“Nina aitakta Kaem ko aira ikial mu karo tualko,
8 nengemang aora biya me bagaralko,
girakala ninga girigir alo sor garagarayam te bitakasan iwitata me beteralko.
Yar 40 ningi ani kilek aguwaya bitakasam mu nuna aringiman,
bare nuna agiring batagurukasan, ale ani ago ko den ngual ngual balukasan,
ale munan umutang te aninga angamang ninguru maguwukasan.
10 Umutang ko ani kariimet umu nunga angamang magaram se iwita balem,
‘Nunga ikia nunga nongomang pempem parasoso kirker namoso,
ale nuna aninga munan me ko kuesan, agiring me karo tusan.’
11 Ani angamang magaram se den aora biya balem:
‘Nuna aninga kuwim lila mu te me ta kasu nagumonko!’ ma balem.” ^{▼▼Heb 3:7-11 Psalm 95:7-11. Israel alo sor garagarayam mu te: Numbers 20:2-5.}
12 Se aga singsang, ninguru sinar talko! Nenenga ningi bo ko gomang ningi nunguning sapuruk ale Kaem marak bagoso wore buring tuok bore ko sinar talko. Kari uwutata beteso mu ikia memek duap duap noko gomang ningi aniso se nu uwutata beteso. 13 Buta se nina tom suen biya ninimi nengemang sokel tui se bagaralko! Mu awuk, tom Kaem ko batoga te ko balso “aitakta” ma balso, mu tom ana te bagasan ta imitang. Nenenga ningi bo munan kilek kawel nu kulok se te munan memek bitiruk ale nama gomang au kapuruk ale Kaem buring tuok bore ko. 14 Mu awuk, ana nangamang ningi nunguning duap te taman mu me sapanak, am ilukuawunak nama tom nukum te, umutang mu ana Kristus ilak wete baganakko. 15 Se den ani maingkala ninga manem wore aking ko ikia talko:

“Nina aitakta Kaem ko aira ikial mu karo tualko,
nengemang aora biya me bagaralko,
girakala nuna Kaem kuring batagurukasan iwitata me beteralko.”
16 Se arika kariimet Kaem ko den ikiman bare me karo tuman? Mu nanga girigir alo Egypt ningi bagaman se Moses nunga giam arungu aratam borta Kaem ko den me karo tuman. 17 Se yar 40 ningi mu Kaem arika nunga gomang magaram se kua parangakasan? Mu nu kariimet sor garagarayam te nama se kilek memek memek bitakasan borta nunga gomang magaram. 18 Se Kaem den aora biya balam, “Nuna aninga kuwim lila mu te me ta kasu nagumonko,” ma balam, mu nu arika nunga uwutata balam? Mu nu kariimet noko kuring batagorman wore nunga uwutata balam. Buta se ana ikisan, nuna nongomang ningi nunguning mena, umutang ko nuna kuwim lila mu te kasu nagumonko me terong. ^{▼▼Heb 3:15-18 Israel alo: Numbers 14:1-3, 26-33.}

19